Psa 149 | WSK | STEP | O aleluya! Kari Biya nup patowaralko! Wur iru iluwal ale nup patowaralko! Nina ko kariimet biguwural ale ko nup patowaralko!

Psalms 149

Kari Biya amilmil tua ko wur bo

1 O aleluya! Kari Biya nup patowaralko!

Wur iru iluwal ale nup patowaralko!

Nina ko kariimet biguwural ale ko nup patowaralko!

2 Isrel kariimet, Kari ninga nungam mu ko amilmilaralko!

Saion kariimet, ninga King ko amilmilaralko!

3 Bawe moa se, gita ela se, iru se nup patowaralko!

4 Mu awuk, Kari Biya noko kariimet nunga amilmiloso,

ale kariimet nunumi ira kutuwusan mu nunga sangarso ale nup biya nungarso.

5 Se umu ko nina ko kariimet, amilmilaralko!

Ale turom uriluan amilmil wur ilu se lagaralko!

6 Nigiring biyala airal, ale Kaem nup patowaralko!

Ale ninga batir kore wuli kapawara mu nigiting te iluwal ale

7 te sor saki ko kariimet arungu kageraral ale nunga menawuralko.

8 Ale nunga king se nunga kari bibiya mayang aora te nunga taliparalko,

9 ale Kaem ikup aguwaya nungumik te beteralko ninga maonam mu nungumik te am beteralko.

Kaem ko kariimet uwutata ura betemon ale motam saki nunga kiamonko.

Aleluya! Kari Biya nup patowaralko!